絲絲講場：港交所籌辦LME WEEK亞洲版
港交所（00388）自從「天價」買起倫敦金屬交易所（LME）後，不斷催谷LME，係咪會生金蛋絲絲唔知，但港交所就唔放過任何推廣LME機會！據聞佢哋想搞番個LME WEEK「亞洲版」，六月喺香港舉行。
話說LME WEEK係LME一年一度嘅重頭戲，亦都係商品期貨界嘅一大盛事，全球主要金屬期貨交易員、期貨商、生產商、用家、炒家等，都會聚集喺倫敦出席研討會，交流意見，順便傾吓來年走勢，即係互相「過料」，為未年一年嘅交易作出部署。記得舊年就喺十月舉行，港交所行政總裁李小加都有飛過去倫敦，出席年度晚宴。
會期適逢上市13周年
絲絲聽聞，今年LME WEEK依舊在十月喺倫敦舉行，但港交所就想搞番過「亞洲版」喺夏天舉行，「亞洲版」將於六月廿四日至廿六日喺香港舉行。
到時有乜人出席，絲絲依家就未知，但呢次被視為港交所首次向全世界展示亞洲尤其係中國龐大市場，喺商品期貨嘅市場潛力，肯定有唔少內地用家同埋生產商捧場，加上六月廿四日適逢港交所上市13周年酒會，到時場面肯定會星光熠熠，絕對唔係「山寨版」！