絲絲講場：保誠講少一句 唔見3.6億
金融海嘯後，好多美企要減磅套現，當時未上市嘅友邦保險（01299）都周圍搵買家，英國保誠（02378）一度出手，但喺一○年擱置，之後唔單只要畀一大筆分手費，仲不停畀英國監管機構盯實。
譚天忠免落台執身彩
依家終於有「判決」，罰款3,000萬英鎊（約3.6億港元），集團行政總裁譚天忠被譴責，辣就係辣啲，但總算畫上句號。
絲絲明白點解要畀分手費，但就唔太理解，保誠只係喺打算收購前，冇同英國監管機構「單聲」，咁都要罰錢？聽講，原先英國金融服務局（FSA）要求保誠奉上8,000萬英鎊，再罰多譚天忠40萬英鎊，先下到呢啖氣！
雖然畀完分手費，又要罰錢，不過罰款比預期少咗一大截，總數只係3,000萬英鎊，而且譚天忠又唔使落台，成件事拖咗成年都算係咁啦！
收購唔成業績一樣靚
即使收購友邦落空，保誠喺亞洲業務一樣發展得唔錯，上年業績又咁靚仔，仲增派息。
絲絲諗，嗰陣鬧爆保誠用高價收購友邦嘅投資者，都應該幾受落啦！
保誠主席Paul Manduca話事後諗返，對於集團無向有關當局預早提出有收購嘅考慮，覺得好抱歉！FSA就好識做，講明呢啲都係舊事，與保誠集團管理層現時嘅操守無關，仲話接受保誠當時無預先就收購通知有關當局，唔係罔顧後果或故意，算係幫手打圓場啦！
余詩韻