期指觀瀾：好倉食胡目標不變
期指結算日以為會鬼哭神號？事實卻是平淡之極，四月期指於昨日早上約十時，已完成全日高低位22,556及22,330點，之後交易時段，在22,409至22,530點的百多點波幅徘徊，悶到收市，大孖沙長假前，收爐味道極濃。
隔晚美國經濟數據大部分都優於預期，道指再創新高，見過14,561點，即使拉牛上樹，港股總算在期指結算日，以及第一季結前夕升153點收報22,464點，大市成交633億元，較周二的641億元回落，臨近長假亦唔算縮得離譜了。
跟不上外圍升勢
唔使睇波幅指數，有參與開期指嘅玩家，應該都感受到近期即市搵食艱難的事實，大市由23,262點急跌至21,975點之後，完全跟唔到外圍升勢，港股自顧自低位沉淪。筆者成日問新手，喜歡刺激地輸，抑或悶住去贏？
筆者有七成信心恒指在21,975點見了短期低位，但要瞓身，刻下這種市況顯然唔係時候，今次小注揸住22,185點開嘅好倉，揸住近一星期，帳面利潤唔夠300點，不過，總比給無定向風的市況，左一巴，右一巴，日日揩幾十點好。好倉已轉落四月，見咗22,581點目標食胡後再諗。
John Mullen