塞浦路斯終跟歐盟和國際貨幣基金組織達成協議，無發生所謂的蝴蝶效應，亞太區股市昨日做好，港股都有逾百點升幅，但主板成交就縮到606億元，依然受制於10日線。
滬深兩市更加係反高潮，高開後沒多久便轉頭回落，滬綜指收市跌1點，跌幅唔大，圖表上卻做出一支小陰燭，上周「四連陽」的走勢斷纜，整體氣氛唔熱烈，短線持續炒上的誘因唔多。就算技術分析大師Tom DeMark話A股的拐點已現，未來九個月可勁升48%，都唔代表由呢一刻起可以升唔停，更可況唔到九個月後都唔知其預測有幾準，股民要調校自己的投資情緒，唔可以太樂觀，又毋須太悲觀。
仲有一個星期就到季結，亦是內銀股出業績的時間，打頭陣的建設銀行（00939）多賺14%，增加派息。較值得留意的是期內淨息差輕微擴闊，不良貸款率下降，業績符預期。至於重農行（03618）盈利升26%，亦算有交代，有此參考，投資者即刻揸起鑊鏟炒埋其他內銀股，板塊昨全線上升。
中國銀行（03988）及農業銀行（01288）今出業績，昨日分別升1.4%及1%。早前有傳內銀大舉向光伏業借貸，單是中行就借出了200億元人民幣，數額未經證實，影響唔似太大，毋須過分憂慮。不同於其他內銀，中行擁較多美元資產，更有參與美國地產放貸業務，業務較多元化，預期盈利增長維持雙位數。股價昨重上10日線之上，守得住，加埋業績若對辦，可睇4元。
一飛