上周塞浦路斯出事後，英國財長歐思邦忽然「抽水」，話如果英國好像塞國咁無辦法向世界證明國家有能力償付，市場信心就會崩潰，仲話塞國就係英國最佳反面教材，所以英國有必要繼續堅持緊縮政策。
上周英鎊渡過「黃金七十二小時」，二月份通脹按年升至九個月高位2.8%，連續三年高於英倫銀行所能容忍的2%上限，亦幾乎確認英國通脹有重新升溫勢頭。
英國上年除第三季因奧運效應令GDP經濟出現正增長，其餘三季都係負增長，滯脹格局愈來愈明顯，而英倫銀行會議紀錄公布，重點係大部分委員認為量寬令英鎊貶值過度，而持續貶值就會推升通脹，唔駛好耐通脹又會升至3%。
技術上，英鎊上周突破重要阻力1.525，短線或再挾淡倉，有機會衝上1.535至1.54水平，惟大方向依然向下，料大批淡友已望實1.55水平，隨時準備再做淡英鎊，因此短線博英鎊反彈仍需驚住炒，寧願睇睇有無機會挾上才再沽英鎊。
GMO CLICK環球通副總裁 陳健豪