金融徐筆：中國綠色難有起色
上市公司發CB（可換股債券）梗係「合皮」啦，如果買家行使到，上市公司唔使還錢，債務一身輕，揸住CB行使搵到錢，負責嘅公司搵到食，大家都開心，幾理想。不過發得CB，有一個隱藏咗嘅假設，咪係股價要向上升，如果唔係嘅話，情形就會大不同！
中國綠色食品（00904）於一○年三月發咗一批13.5億元人仔CB，三年期，轉眼間到期了，行使價超高，要成11.24元，係現時股價嘅6.6倍，你係正常人或者地球人，都唔會行使啦！係咪？
無計，公司惟有跪低，重訂條款，贖番一部分，其他嘅，梗係「三年又三年啦」，息率更加要提升至7.9厘，此情此景，惟有照跟！再睇真啲，贖番嘅錢，又係要問癡心小股民攞，又一次「癡心錯付」，真係無言的結局咁話。
博反彈要藝高膽大
財政狀況就仲唔樂觀，手頭現金得番7.2億元人仔，按年急跌57%，公司由於贖回CB令佢由正流動資產淨值5.02億元人仔急速地變成負流動資產淨值4.8億元。致命位梗係過度投資同債主追數，真係「屋漏兼逢連夜雨」。公司PE確係低，得番2倍左右，博反彈又想一試身手嘅投資高手，自己諗。
Prof. J買股一定要買有動力、唔怕高追，最怕無力水，收到未先？
香港大學電子金融服務榮譽助理教授 徐燦傑