近來股市不濟，搞到一班股民信心受挫，宏利投資者意向指數就顯示，喺亞洲區裏面，香港嘅投資者較為悲觀，得分只有負4分，悲觀程度只係僅次於負8分嘅台灣。比起有13分嘅中國，以及10分嘅新加坡相距甚遠。而本港25至29歲嘅年輕投資者，更加係亞洲同輩裏面最悲觀o架！
調查喺亞洲七個市場進行，每個市場訪問咗500名受訪者。
結果反映，唔同市場有唔同嘅投資偏好，香港人就比較鍾意投資股市，但係就唔建議依家入市，因為個市場太波動啦！咁買磚頭係咪好投資呢？
調查裏面有超過半數嘅本港受訪者對房地產有負面情緒，認為樓價過高，預期將會有調整咁話喎。
絲絲發覺，身邊好多朋友成日都話儲唔到錢，同調查結果脗合，近半數嘅香港受訪者認為，佢地喺實現個人理財目標嘅進展滯後，只有12%受訪者可以超前預定計劃。
計我話，有錢無錢都好，只要保持樂觀嘅心境，咁就咩都抵番晒啦。