保險從業員要跑數，唔知對跑步有冇幫助呢？自言「跑數同跑步一樣咁叻」嘅康宏理財（01019）主席王利民（Quincy），下星期會同同事分道揚鑣去跑馬拉松，佢去挑戰北極嘅寒風，10位同事就去熱力逼人嘅撒哈拉沙漠！
話說前年Quincy先去完撒哈拉跑馬拉松，依家坐唔定又想突破自己，佢講笑咁話：「兩地嘅溫度可以相差成100度o架！」呢次佢去北極跑四十幾公里長跑，預計要跑七至八個鐘頭，去到咁極端嘅地方，絲絲聽到都打咗個冷震，Quincy話為咗適應吓啲溫度，佢會先喺冰房跑步，預習吓咁凍嘅地方。
為咗慶祝康宏成立二十周年，Quincy同一班同事嘅奮鬥經歷，將會被製作成叫做「極地狂奔」嘅電視節目，真係保險界嘅第一次啦。
嚟緊一年，該行會主力開拓內地業務，維持兩年後中國業務可以盈利嘅目標不變。Quincy話想將康宏中國打造成綜合理財服務商，除咗銷售保險之外，希望賣埋基金、信託產品，但係就無計劃喺未來兩年再開拓新網點喇。
余詩韻