期指觀瀾：短期見底機會稍高
塞浦路斯一如希臘、意大利及西班牙，財困問題最終有驚無險，外圍股市紛紛向好，中港股市表現繼續跑輸外圍，昨日恒指升135點報22,251點，但不妨睇番兩隻重磅指數股，建設銀行（00939）及中海油（00883）因為業績分別抽升2.27%及4.19%，貢獻指數接近70點，相當於港股昨日超過一半升幅來源，在在反映實則市況依然疲弱。
昨日現貨成交唔配合之外，就連沽空佔大市成交亦見進一步萎縮，由上周五8.13%跌到7.37%，是二月初以來最低紀錄，仲有三個交易日基金季結，看來大戶大都抱一動不如一靜心態，等三月底四月初長假回來後才重新部署。
昨日恒指即市曾經見過22,351點，之後回頭，剛好壓在10日線22,357點樓下。事實上，如果睇番過去幾日大市走勢，上周一急挫449點後，六個交易日港股在低位橫行，卻出了五枝陰燭，反映唔少炒即市玩家，趁市靜，守住部分重要阻力位，逢高做淡，賺幾十點就收市前平倉，但筆者在本欄推介，好難向各讀者建議炒得咁短。
暫時，有六成信心港股短期已經見底，22,185點開的好倉繼續以21,922點為止蝕，短期目標22,581點暫時不變。
John Mullen