日做夜做，繼續為大家追蹤不同股票係Prof. J嘅高度使命。寫嘢唔一定要推介嘅，叫你小心都係一件相當唔錯嘅事。如果唔係，一個走避不及，問題自然就會愈演愈大！
洛陽鉬業（03993）毛利急跌就唔使講，最誇張嘅係鉬爐料跌得最「甘」，其他黃金同白銀就跌咗一半。原因唔使講，梗係需求減少、不能提價、只有減價同外圍環境差，以上Prof. J統統照單全收。因為唔咁講，仲有乜嘢好講呢！
不過，眼仔一轉，見到佢嘅盈利只係下跌6%，唔通管理層又再一次立下高功，為公司創造更佳價值。一睇，價值就係價值，不過係投資價值嘅收益，即係炒嘢啦。加上營業外收入，即係阿爺嘅補貼。如果阿爺休息、炒嘢出事嘅話，應該唔係下跌6%。
如果咁睇，大家會知道阿爺嘅補貼唔係無止境，總有退潮嘅一天。以Prof. J嘅研究，一般係3至5年，所以阿爺幫你，你都要畀心機，係咪？為咗填補空缺，只顧用錢買內地銀行嘅投資理財產品，本末倒置。小股民又覺得你不務正業，又覺得你資源同時間出現重大嘅誤差，可能最終得不償失添。
最令人擔心就係A股集資嘅錢，竟然比投資內地嘅理財產品份額遠遠地拋離！我係投資者，見你咁搞，倒不如自己投資自己嘅錢。正所謂：「命運在我手，打死無煩憂」。繼續留意佢哋管理層事態嘅發展啦。繼續追蹤，出發！
香港大學電子金融服務榮譽助理教授 徐燦傑