梁高美懿自從喺恒生銀行（00011）退休之後，好多人都估佢唔會靜落嚟，皆因做慣「女大班」，咁多年以嚟積落嘅活力，唔係話退就退。
果然近日多間大藍籌都公布，搵咗佢做非執董，以呢個走勢，大有可能陸續有來。
利豐（00494）宣布，委任梁高美懿為獨立非執行董事及審核委員會會員，四月一日起生效，為期三年。
根據服務合約，其董事袍金為每年16萬元，作為審核委員會會員之額外酬金則為每年10萬元。
梁高已經係第一太平（00142）嘅獨立非執行董事，二月尾嘅時候又做埋新鴻基地產（00016）嘅獨立非執行董事，咁多職務真係有排佢忙。
傳聞港交所（00388）搵咗佢加盟董事局，替代任職七年、即將退任嘅夏佳理，令港交所嘅董事會終於有一把「女聲」。
絲絲尋日問港交所行政總裁李小加，董事會係咪會有「女聲」，佢話董事人選主要視乎個人嘅領導能力，並不受限於性別。