樓市「國五條」出台後，內地「因相愛而結合，為避稅而離婚」嘅大有人在，上海閔行區民政局今個禮拜專誠喺婚姻登記中心門口擺咗個「樓市有風險，離婚需謹慎」嘅警示牌，提醒各位千祈唔好為咗躲避法規而輕率選擇「假離婚」，而閔行區法制宣傳教育領導小組辦公室都喺官方微博發布溫馨提示，警告大家，夫妻一旦離婚，所有財產會進行分割，買樓之後產權都會歸於一人名下，如果「假戲真做」結果可能會得不償失。
「國五條」細則雖然仲未出，點樣避稅已經成為全民熱話，上海、南京、武漢、寧波等地近排都掀起離婚潮，當中甚至包括埋孕婦。好似今次張貼「黃榜」嘅閔行區民政局，近期登記離婚同申請單身證明嘅數量持續上升，淨係三月首周，就受理離婚登記205對，出具無婚姻登記紀錄證明2,050份。
其實婚姻係神聖嘅契約，就算「假離婚」可以避稅，如果有人用賣樓嘅名義騙婚騙財，隨時一身蟻，一邊攞住房貸申請表，一邊開開心心去離婚嘅夫妻真係應該三思。