渣打集團（02888）尋日出咗個通告，主席莊貝思自己推翻早前喺業績發布會上講嘅嘢，仲連埋兩位高層齊齊為言論道歉，做法都幾罕有，莫非說話內容激嬲咗美國司法部？
話說莊貝思喺今個月初，聯同行政總裁冼博德、財務總監麥定思，為年度業績舉行記者會，當佢回答有關渣打管理層削減花紅問題時，曾經咁講過：「我們沒有故意規避制裁規定的行為；要知道，錯已犯下……實屬文書差錯……我們去年所講的是諸宗明顯屬於文書錯失性質的交易……」
唔知係佢自己發現，定係畀人搵到破綻，莊貝思就話自己講錯，特別係「沒有故意規避制裁規定的行為」呢一句。仲話要收回言論，又話今次專登澄清，仲代表銀行、員工明確承受其過往及故意違反美國經濟制裁法律法規，及相關紐約刑事法律嘅責任！
最後佢仲聯同冼博德、麥定思，就佢個人持相反立場嘅言論道歉！睇落好似好嚴重咁。
其實，過往有好多銀行高層做完和解都會講番句，「即使我哋賠錢、和解，都唔代表我哋有錯」，有分析師話今次渣打道歉，主要係為咗安撫班監管機構，始終佢同美國司法部仲有延遲檢控協議，如果渣打喺兩年內遵守協議，成件事先close file！
余詩韻