絲絲講場：花旗「金」卡保證過到關
尋日有一張分量十足嘅信用卡喺香港面世，唔單只信用限額，就連卡嘅重量都唔可以睇小！花旗香港呢張含金量十足嘅Ultima Card，已做過好多測試，喺機場保安系統面前行嚟行去都唔會被「嘟」。
花旗香港信用卡及無抵押信貸業務董事總經理伍楊玉如（Maggie）話，為咗確保張金屬卡去到機場唔會畀保安系統「嘟」到，佢已經親自到機場做實驗，佢話喺機場行嚟行去都無被「嘟」，叫大家可以放心使用喎。
Ultima Card以混合金屬物料製成，有一個錢幣咁重，成本比一般信用卡貴成百倍！
目標吸納千萬富翁
Maggie仲話，Ultima Card本身需要喺海外製作，然後再喺香港打印。點解整一張卡咁大陣仗？梗係啦，佢嘅目標客戶群係千萬富翁喎。
花旗香港嘅信用卡推廣一向進取，舊年嘅信用卡帳戶數目按年上升咗17%，零售簽帳額亦大升18%勝市場，Maggie預計今年嘅撇帳率會微升，但係無阻佢哋今年推出一系列新產品，大家就密切留意啦。