星展香港近年力拓財富管理，可謂有聲有色，但絲絲收到風，其中一員猛將就嚟離巢，佢就係星展香港董事總經理兼零售銀行業務豐盛理財及分行網絡業務主管鍾少權（Derek）。
聽講尋日星展香港內部都出埋通告，絲絲向Derek求證時佢都坦承下個禮拜就last day！
絲絲最關注嘅梗係Derek去向啦，究竟係發展個人興趣、入地產界再做「樓神」定係繼續留喺銀行界呢？Derek就話會撈番老本行做賓卡，至於落腳點就三緘其口，話四月返新工，到時自然會揭盅。
其實Derek過去幾年喺星展香港都做到不亦樂乎。絲絲記得佢管按揭時就係按揭戰最激同按息跌到唔夠1厘，接管存款時又撞正市場資金抽緊，存息係咁升，加上之後改良分行網絡同搞起「豐盛理財」。
儘管Derek一直忙到七彩，但係佢話好開心，因為成班同事到最後一刻都仲係好信任同好幫得佢手。
至於Derek走咗之後，星展香港通告就話，高級副總裁梁裕亨會暫時接任。