中銀保誠信託行政總裁陳禹昌（Thomas）尋日先同絲絲報喜，話旗下「我的強積金計劃」轉會數字有正流入，轉頭今日就飛去尼泊爾，佢話有啲好激嘅玩意，唔啱我哋啲年輕人喎！
絲絲估計，Thomas當然係有好成績先放心同太太、朋友們去旅行啦！聽講，除咗「我的強積金計劃」成績算幾好，嚟緊仲會不斷加強網上服務，方便想轉會又怕填form嫌麻煩嘅打工仔，等佢哋可以上網填e-form，遲吓仲可以上網簽埋名，認真高科技！
講番去旅行，Thomas大爆自己已經去過五次尼泊爾，佢仲話一旦試過，就會上癮，瘋狂攀山！佢話攀山呢啲咁激嘅活動，要心平氣和，最好就行步路、抖啖氣都慢過人；年輕人情緒大起大落，好易有高山症！
聽講，Thomas揀咗幾條路線，其中一條去到山頂已經有6,200呎咁高，仲會喺山上逗留14日，有幾日仲要紮營瞓雪地。
雖然佢係攀山專家，不過，因為佢有前科，試過出現高山症，搞到又暈又嘔，所以絲絲點都要提多佢一次，要量力而為，今次上唔到山頂咪下次先上囉！