內地有報章執行總編輯就話諗起15年前肖鋼嘅親民形象，當時肖鋼由中國人民銀行廣東省分行行長，紮職為人行副行長，臨離開廣州之前，特登邀請一眾傳媒朋友食飯打牌。呢位總編當時只係一名跑前線嘅小記者，對於堂堂廣東行長請食餐便飯，感到受寵若驚，而肖鋼更記得佢哋個名，同佢哋交流廣東銀行業嘅睇法。佢話當日聚會只有五至六個記者，食嘅只係粗茶淡飯，亦都無飲酒，令佢哋覺得好舒服同溫馨。
牌品好 出錯唔鬧人
食完飯肖鋼仲話想陪記者朋友打陣麻雀，佢哋話肖鋼打牌認真、牌品好，就算對方出錯牌都唔會開聲鬧人，令記者印象深刻，即使位高權重都不忘自己係個普通人，關心老百姓，係社會之福咁話！