張華峰自從當選做咗立法會議員，非常勤力，經常喺議事堂度為經紀發聲，長期開會更加令到佢嘅體重「反彈」也義無反顧。佢日前又親自出面，主動邀請八大經紀組織代表，喺下個月十七日，同港交所（00388）行政總裁李小加「世紀飯局」。
雖然食飯係好平常，但港交所喺一片爭議聲下推出嘅「夜期」，即將喺四月開波，單嘢令到好多小經紀唔開心，唔通張華峰想幫小經紀同李小加做「和事老」擺「和頭酒」？
記得早前港交所同張華峰以及五大經紀組織都有就「夜期」食過飯，但嗰次飯局李小加並冇出席，只派出港交所股本證券與定息產品及貨幣聯席主管戴志堅等做代表。
因為港股加時，中小經紀「飯鐘」扣減，佢哋多次遊行、甚至絕食，表達不滿，港交所都企硬，並將矛頭直指李小加。今次飯局，唔知場面會係點呢？
不過，大家都係成年人，最近八大經紀組織喺港交所展覽廳搞春茗，一向炮轟得港交所最激烈嘅證券及期貨專業總會會長王國安，偏偏被安排坐喺李小加隔籬，不過，絲絲見到兩人喺現場滔滔不絕，有講有笑。
所以話呢，呢個世界邊有永遠嘅敵人，只有永遠嘅利益。
余絲韻