號稱史上最嚴厲嘅A股IPO財務核查，今個月底會完成自查部分，嚟緊嘅兩個禮拜，有超過七百間排緊隊等上市嘅公司要趕上北京提交自查報告。
絲絲聽聞，唔單止中證監附近嘅酒店已經一早預訂爆滿，連幫手釘裝報告嘅快印店都一位難求，特別係離中證監三公里範圍內嘅「榮大快印」，更加係忙到冇停手。
有投行中人話，近排「榮大」日日都人山人海，去嗰度仲不時撞到啲久未聯絡嘅舊同事、舊同學，簡直係同業必到勝地。
原來呢間「榮大快印」喺業內非常出名，根據北京一間投資顧問公司出嘅「赴京攻略」指，「榮大」壟斷咗內地擬上市公司申報材料打印業務九成市場，以員工對送審材料格式之熟悉，校稿、排版效率之高，喺投行業建立咗良好口碑。
路邊社消息話，「榮大」為咗迎接三月尾嘅「打印狂潮」，喺上個禮拜仲專誠翻新咗個洗手間，相當體貼客戶。聽聞已有二百幾間要交報告嘅公司提前訂咗位，相信月尾前呢兩個禮拜，「榮大」員工實忙到停唔到手。