自從最低工資實施之後，飲食業就愈來愈難請人，尤其係洗碗工，好多餐廳都缺洗碗工，就連大快活（00052）都唔例外，尋日大快活登出一個招聘廣告，誠聘多名洗碗員。
一個簡單嘅招聘廣告又點解會令絲絲留意呢？原來大快活嘅廣告入面，話一個洗碗員工作5至9個鐘，時薪竟然高達9,000蚊！根據絲絲嘅經驗，時薪9,000蚊，就連一個醫生、律師都未必會有。所以絲絲見到都想即刻去應徵呢份「筍工」呀！
不過大快活好快就知道自己「擺烏龍」，尋晚透過公關回應就話，係人事部同事出錯，將月薪寫成時薪，而且發現有錯誤之後，已經即時將廣告收起。公關又表示，兼職洗碗工月薪要視乎工作時數，最高月薪係9,000蚊。
絲絲就聽過有飲食業人士話「一萬蚊都請唔到個洗碗工！」，店長經常要幫手洗碗咁話！洗碗工長期不足下，好多餐廳都要改用機器洗碗，又或者改用即棄餐具，以代替洗碗工咁話！
余絲韻