絲絲講場：信誠60秒體驗炒股哲理
信誠證券日前舉行春茗聯歡晚會，筵開40多席，慰勞一班長期客戶同勞苦功高嘅員工。席間仲加入「決戰一分鐘」遊戲環節，畀賓客們比併吓身手。而三個需要喺60秒內完成嘅遊戲名都好好意頭，既有「左右逢源」（雙手互換各三個空嘅同滿嘅汽水罐），又有「財骰（息）兼收」（喺雪條棍上疊骰）同「勝珠在握」（夾波子），祝願客戶今年投資得心應手咁話。
劉昇昂：投資唔係買字花
絲絲諗起，呢個遊戲節目成日提醒參賽者練咗先好嚟，其實買股票又何嘗唔係台上一分鐘、台下十年功。信誠證券董事總經理劉昇昂分享話，投資股票唔係買字花，而係一分耕耘、一分收穫，買任何一隻股票前，都要做好功課，睇清楚公司盤數、過去通告，同了解管理層作風，絕對係一個考驗耐性嘅「遊戲」。
預留資金做iBond孖展
如果你做唔切功課，劉老闆就建議認購第三批iBond，原因係一抽中幾乎賺硬，估計首日可見106元！老闆話，信誠去年收到約3,500份iBond申請，今年目標升到20,000份，又預留咗約5億資金，畀新舊客戶做100%借貸、零利息同零按金嘅孖展認購。