期指觀瀾：小注做好博反彈
周一港股急挫449點，仲以為隔晚美股對塞浦路斯準備向存戶開刀，徵收存款稅的反應唔算大，歐洲股市也由周一早市的平均2%跌幅收窄，港股能夠有似樣的反彈，估唔到動力竟然如此薄弱。昨日恒指高位22,218點，僅僅觸及周一下跌裂口22,185至22,494點的邊緣，經已見淡友反攻，即使再樂觀，恐怕都已捱唔住浸浸落的弱勢，昨午後被震走。
昨日現貨再跌41點收報22,041點，期指低水幅度擴大，沽空佔成交比率一連三日出現雙位數，但已由前日10.79%回落至10.06%。在各項技術進入超賣區下，後市完全補回裂口的機會唔細，估唔到昨日僅僅補回了裂口約33點，的確有點失望，但外圍股市牛氣依然，滬綜指亦止跌，昨日收報2,257點升17點。
港股要長期違反外圍向好的勢頭，自顧自走弱的情況要延續幾耐？只有等將來歷史話畀我地知，但既然恒指經已早一步作出修正，在外圍無唔妥之下，先從高位跌掉8%，衡量利弊之後，筆者還是傾向小注博反彈，好過失先機要去追沽，昨日期指買入價22,133點，尚幸只係投石問路式的小注，仲可以再溝，繼續以21,889點為止蝕，收市確認跌穿就立即斬纜。
John Mullen