曾經係內地基金界一哥嘅王亞偉，投身私募基金昀灃證券投資之後一樣咁掂，佢執掌嘅第一個私募理財產品最近畀人發現出現喺A股上市公司廣電網絡嘅十大流通股東名單上面。如果以舊年第四季隻股票嘅平均價計，佢揸到依家已經賺咗一成五左右，成績相當唔錯。講起呢隻廣電網絡，原來喺王亞偉做緊華夏基金經理嗰時都試過揸重貨，令次傳出「一哥」轉投私募基金後，對以前嘅愛股仍然不離不棄，恐怕會喺散戶當中再引發一輪「王亞偉概念股」尋寶熱。
絲絲仲記得，舊年「一哥」告別公募基金業嘅華夏基金時講過，班散戶喺唔知佢點揀股，又唔似得佢有對沖機制嘅情況下，成日一味盲目照跟，搞到佢次次要買嘢前都好大壓力，連帶做投資決定都受到影響，可以話係令佢離開呢行一個主要原因，仲話希望唔喺呢行之後，對市場唔再有影響。
不過，王亞偉喺內地小股民眼中幾乎可以「點股成金」，今次佢轉做私募後執掌嘅首個信託產品再度現身上市公司十大流通股東，又點逃得出散戶粉絲們嘅法眼。
余詩韻