絲絲講場：漫畫版自傳還原喬布斯

而為咗紀念教主，佢嘅日本漫畫版自傳將會喺今個月二十五日起，喺日本最大書店之一嘅講談社旗下少女漫畫雜誌《Kiss》開始連載，而主筆係曾執筆當地大受歡迎漫畫《羅馬浴場》而聲名大噪嘅日本漫畫家山崎麻里（Mari Yamazaki）。

主筆憑《羅馬浴場》奪獎

麻里係出身自京都嘅女漫畫家，現時喺美國芝加哥居住，一○年以《羅馬浴場》呢本漫畫勇奪日本第三屆漫畫大獎以及第十四屆手塚治虫文化獎短篇獎。

舊年《羅馬浴場》更被日本第一大嘅東寶電影公司拍攝成電影版，仲搵嚟阿部寬同上戶彩擔當男女主角，結果該片亦成為咗去年日本上映電影票房第二位，共收近60億日圓，僅輸畀同屬東寶嘅《海猿4》咋。

真實面貌不經修飾

所以本身亦係《喬布斯傳》日文版出版商嘅日本講談社，今次順理成章攞埋日文漫畫版嘅版權，內容會依照美國Walter Isaacson出版社舊年八月出版嘅原著作為藍本。

早前麻里亦已經公開咗佢嘅喬布斯漫畫草圖，雖然作為女性，兼且《Kiss》雜誌嘅主要讀者亦都係女性，但麻里似乎冇打算做過多迎合女性讀者口味嘅修飾，反而選擇喺最大程度上，還原真實嘅喬布斯面貌。

雖然暫時呢本教主漫畫自傳只得日文版，但斷估講談社日後定必會出中文版，事關教主喺華人社會都有幾多粉絲o架！

余詩韻