絲絲講場：土豆創辦人復出搞動畫
自從內地視頻網站土豆網同競爭對手優酷網合併後，土豆創辦人王微（Gary）辭去土豆網CEO，並淡出公眾視線，但原來Gary並非就此榮休，經過半年時間準備後，佢宣布下個月將會喺北京成立一家動畫工作室，實行做中國版Pixar。
睇好內地電影市場
唔講唔知，原本Gary一直對藝術有情意結，曾經就一齣中國戲劇，同埋幫美國嘅芭蕾舞團寫過劇本。
九十年代留美讀書嘅佢，喜歡美國式嘅思維文化，為咗幫新公司搵人才，佢年初亦親自拜訪美國LA等地嘅導演同動畫師；資金方面，Gary透露已經從國際投資者籌得幾千萬美元，為搞動畫公司做好一切準備。
新公司製作嘅動畫，主要面向內地觀眾，Gary直言，五年前嘅佢，係唔會沾手呢門生意，不過依家中國版權環境改善咗，電影院又多咗，時機總算成熟。內地統計數據顯示，去年內地票房達170億元人民幣，僅次於美國，成為第二大電影市場。
不過市場雖然大，但係要面對荷里活大公司如夢工場（DreamWorks）等嘅直接競爭，點解咁有信心？
中國有idea無經驗
Gary就話，中國人其實有好多smart idea，只係因為欠經驗同埋技術，令細公司舉步維艱，佢都承認距離成功仲有一段時間o架，但就揚言做動畫嘅潛力可能會比土豆網更加大。