絲絲講場：方舟食盆菜新地有福氣
新地（00016）搞嘅愛心慈善活動，真係多到絲絲都記唔到，今次呢個都幾特別，就係由主席兼董事總經理郭炳江，請「老友記」去馬灣公園挪亞方舟食盆菜，仲做埋鼓手添。
郭炳江上台打鼓助興
宴上有長者表演鼓樂吹彈加歌唱跳舞，郭炳江亦被拉埋上台學打鼓，畀在場婆婆讚佢打得好鬼有型。
最後有個婆婆仲送咗對DIY嘅戒指畀郭炳江，郭炳江都欣然接受，仲話一隻自己戴，另一隻會送畀佢太太添。
本身係基督徒嘅郭炳江強調施比受更為有福，對自己嚟講係一份福氣，好似新年咁，係中國人最重視嘅節日，無論係一齊吃飯、互相送禮，定係派利是，都係一份祝福、一種關懷，佢話深深體會到『施比受更為有福』，能夠為他人付出，令別人開心，對自己嚟說係一份福氣。
二千長者順道遊馬灣
新地已經連續第三年同地區組織合作搞長者活動，今次特別喺風景優美嘅挪亞方舟度搞盆菜宴，有成2,000名深水埗同屯門嚟嘅長者參加，佢哋仲可以順便遊覽吓馬灣。郭炳江仲拉埋新地執董兼首席財務總監陳國威到場赴宴，氣氛真係融融洽洽。
據佢哋講，新地義工隊透過探訪活動，去全港派實用「愛心福袋」，有大約7,000名長者受惠。
余詩韻