Market Insight：調整未完持盈保泰

A股狂牛玩完？睇番滬綜指由去年十二月1,949點升到今年二月2,444點，升幅大約兩成五，對比成熟的華爾街股市，道指屢次改寫高位紀錄，其實A股唔算升得特別誇張。再睇經濟復甦持續，儘管近兩個月是稍有放慢腳步，通脹也在控制之內，個個話人行幾輪正回購，有閂水喉之嫌，但見上海銀行同業拆借市場，一個月息率3.33厘，對比一個月前4厘樓上，唔見資金緊張情況。

回調幅度仍屬合理

老友間聚會的非正式統計，席間唔敢買的主要理由，都係怕內地第一季GDP升幅可能低過去年第四季，未知市場會怎樣解讀，較樂觀的古勝，仲係傾向相信今次只係一次中期調整，尤其港股去年才由萬八點水平起步，升了大半年，可見的8至10%調整，其實唔算過分。

放大圖片

放大圖片

本來一月底二月初，就已經提議酌量減磅，除有故仔配合嘅電訊設備股外，其他炒得勁的三四線，至少換番啲有得沽的內銀，即使跌市，都博佢跌得少啲兼有得逃生。

好衰唔衰，畀兩會期間，溫爺爺份政府工作報告，發展潔淨能源美麗圖畫氹咗落去太陽能概念股保利協鑫（03800）度，轉頭內地傳媒話發改委有份意見稿流出，碰啱基金狂質二三線股套現，光伏股跌到七個一皮。

興業太陽能（00750）近三個交易日股價累積跌咗25.4%，卡姆丹克（00712）跌16.7%，保利協鑫跌16.5%，形勢比人強，結果仲係揩番畀個市。

傳聞中光伏發電自發自用部分補貼價每度電0.35元人民幣，同市場預期0.4至0.6元人民幣差一大截，青海、新疆及內蒙的上網電價都比估計低，最大鑊係仲鼓勵競價上網，隨時出現鬥平局面。

搞環保係要付代價

低補貼唔單止對太陽能電站利潤有影響，亦間接令設備成本壓力大增，如果真係出手咁低，光伏股肯定閉翳。不過，會唔會係發改委放風試一試水溫？惟有望係咁望。要知搞環保係要付出代價，尤其太陽能同其他發電方式唔同，暫時仲未有價格競爭優勢，至少成本同煤電，甚至核電都無得比。

借鑑太陽能發展成熟的西歐國家，無論建設太陽電站，或者鼓勵個人家居在屋企建太陽能板自給自足，能開頭通常都由政府提供大筆補貼，唔想「龍的傳人」將來長期在霧霾中過活，政府對潔淨能源資助絕不可少，否則美麗中國的願景，恐怕愈走愈遠。

事實上，傳聞好多時比壞消息殺傷力更大，好似一早存在，不過無嚴格執行的樓市「限漲令」，昨日舊聞新炒，缸邊仲繪形繪聲話深圳「落實」先行，內房全線捱沽，重災綠城中國（03900）跌9.6%，深圳控股（00604）跌7.8%、融創中國（01918）跌7.4%，前日先發優先票據（三年期指標息率9.125厘）抽水的佳兆業（01638）下跌約7.2%。

唔少內房股股價跌番去舊年年底水平，以資產淨值折讓計算，又開始重現吸引力，若要股價真正見底，仲要等中央正式推出新調控措拖，壞消息出盡至有計傾。

炒驚喜宜見好識收

去年度純利倒退逾五成的味千（中國）（00538），昨日股價逆市上升16%，都算跌市奇葩，主要係公司派特別股息帶來驚喜。講到派息，前兩日隻威靈控股（00382）公布去年純利僅增5%，但大增末期息致使股價抽升，昨日始現回吐。

跟勢短炒唔係唔得，但講到尾股價升勢能否持續係要靠未來盈利增長，炒作派息驚喜宜見好識收，免得因小失大。

古勝