呢個世界真係好細，代表深交所出任中華交易服務聯席董事長唔夠半年嘅毛志榮，過檔港交所（00388），接替楊秋梅做內地業務展部主管，五月生效。
中華交易服務係去年由港交所、上交所、深交所成立嘅合資公司，當時深交所策劃國際部總監毛志榮代表深交所出任中華交易服務董事，其後更成為中華交易服務聯席董事長，估唔到轉過頭，就過嚟港交所做，下個星期一（十一日）返工，確保同楊秋梅嘅交接工作順利。楊秋梅會喺四月三十日離任。毛志榮將會向行政總裁李小加同環球市場科聯席主管羅力匯報，亦係港交所管理委員會成員。
毛志榮係深交所「老臣子」，○一年已加入深交所，做過會員管理部副總監。加入深交所之前，喺美國最大醫療保險公司做過，復旦大學畢業後，去過美國讀書，名副其實「讀過番書，浸過鹹水」！
由於毛志榮已被港交所 「挖角」，中華交易服務將會另找他人做聯席董事長。
港交所高層近年好似「車輪轉」咁，不過「有人辭官歸故里，有人漏夜趕科場」，外間都見怪不怪，依家淨番財務總監一職暫時未有繼任人，現時做緊李小加特別顧問嘅簡俊傑，可唔可以「坐正」做財務總監，絲絲冇水晶球，大家等吓啦！