絲絲講場：商務部一哥 網購也中招
商務部部長陳德銘平時個樣睇落好嚴肅，出親來見記者，唔係講出口前景就係傾中美貿易，唔講唔知，原來私底下佢係一個經常上網購物嘅潮人，唔止試過因為買咗啲唔等使嘅嘢，畀屋企人彈，仲同好多人一樣踩過網購陷阱，買過品質低劣嘅產品。
早排更加因為速遞公司拒絕送貨去政府部門，搞到佢原本諗住送畀孫女嘅元旦禮物要遲咗好耐先到，結果令人相當之掃興。陳部長尋日面對一大班傳媒，大方分享自己嘅網購經歷。
速遞唔送貨真掃興
原來佢舊年聖誕前上網買咗塊黑板，諗住今年元旦送畀三歲嘅孫女畫畫用，估唔到去到一月五日都未收到，打去速遞公司交涉，先知對方唔肯送貨上政府部門，雖然搞咗一輪最後都收到件貨物，但係原本送禮畀人嘅喜悅心情已經蕩然無存。
買擦窗器貨不對辦
除咗單速遞事件，陳德銘同普通市民一樣，難逃劣質商品嘅狙擊。
佢話自己試過喺網上買過兩次磁力擦窗器，第一次一擦就跌咗落去，第二次同樣係貨不對辦，就算佢後尾喺網上發現咗更吸引嘅機器人擦窗器，最後都係要忍手，睇怕係唔敢再嘗試喇。
余詩韻