維他奶同可口可樂撈埋會點？絲絲唔敢試，但維他奶（00345）就夠膽。佢哋新請咗一個喺可口可樂做過嘅高層，接替黎信彥做行政總裁。
黎信彥做咗六年行政總裁，今年七月底唔撈，連執董同埋執行委員會成員嘅職務都一併辭去，公司請咗喺兩間國際性消費零售企業做過廿幾年嘅Roberto Guidetti（陸博濤），頂上行政總裁同埋執行委員會成員兩個職位，由四月一日就埋位，有交接期，但就唔使同董事會report，而係直接同執行主席（即係羅友禮）匯報。
陸博濤來頭唔小，曾經喺寶潔（P&G）同可口可樂做過，喺P&G仲做咗成19年添。
最巧合之處，就係佢喺內地市場都有番咁上下經驗，當中喺P&G就擔任過廣州大中華區護髮產品之品類經理/市務總監，之後就做台灣/大中華區零食業務副總裁及總經理；去到可口可樂，就主力負責內地業務。
余絲韻