滙控（00005）舊年業績倒退，唔單止要重整業務組合，有啲要斬纜，有啲要收縮，原來佢哋「重整組合」仲包括埋贊助活動，就連贊助咗六年嘅FEI（國際馬術總會）活動都要斬纜！
滙豐一向都係國際體壇贊助商嘅長青樹，依家有意重新審視現時所有嘅贊助策略，計劃只會針對性贊助重點市場嘅賽事。
○八年起滙豐已開始贊助FEI馬術比賽，而賽事更加命名為HSBC FEI Classics（滙豐經典系列FEI聯賽），每季都會喺不同國家城市舉行比賽，FEI話滙豐會贊助埋今年法國波城（Pau）、澳洲阿德萊德同九月喺英國Burghley嘅比賽，大家就要分手喇，換言之，呢幾場係名副其實嘅告別賽。
FEI當然好唔捨得滙豐喇，佢哋咁支持FEI嶄新嘅概念，令比賽成為FEI其中一個標誌性賽事。而多得滙豐呢條大水喉，賽事獎金亦增添不小。滙豐代表就話呢次中斷贊助合約嘅決定係經過深思熟慮，因為銀行業務現正面對艱難嘅時期，無辦法之下惟有整合所有運動贊助嘅計劃，仲話下年唔再贊助國際運動賽事，呢個決定對體育界嚟講，真係好大件事o架！