絲絲講場：亞洲打出頭姊妹要爭氣
絲絲作為在職女性嘅中堅分子，對「三八國際婦女節」呢一日，真係感慨萬千，既然有個表揚女性嘅節日，可以放假抖下咁就好喇！而巴克萊、MasterCard Worldwide、滙豐，尋日就好應景咁分別出報告，話女性太保守，好難爬男人頭，又話女性喺社會經濟方面仍處弱勢，喺退休準備方面又差過男人。睇完呢啲報告，絲絲更加冇心機返工添！
巴克萊嘅調查報告話，亞洲區只有39%高資產淨值嘅女性係企業家，較男性少11個百分點，亦低於全球水平。報告話可能同精打細算嘅女性企業家較偏好審慎理財有關，姊妹們為減低風險，往往會錯失良機。
商界領袖男人佔多
MasterCard嘅亞太區調查就話，香港女性普遍嘅就業機會，已追得男性好貼，教育水平更加係無得輸，但擔任政商界領袖比例方面，就要同內地、台灣女性繼續發力先得。
滙豐嘅調查顯示，亞洲女性喺退休生活中較男性更可能面對財政困難，五名女性中僅有兩名已為舒適嘅退休生活作好充分準備，男性則有半數。
新世界請飲茶打氣
絲絲有位喺新世界集團返工嘅姊妹，就話唔使咁灰心，佢話尋日喺公司不知幾開心，皆因公司向同事們送贈紅棗茶包及「關懷女性小錦囊」。集團執董兼聯席總經理陳觀展仲特意舉辦咗女同事午間茶敍，畀一眾女同事喺忙碌嘅工作中可以小休片刻，為佢哋打打氣。