每逢有新手機推出，絲絲都會心郁郁想換番部，唔要部舊手機，但又怕唔環保。
全國人大代表、中國移動通信集團四川分公司嘅董事長簡勤趁人大開會，提出加強內地回收處理棄置手機，為環保出力、創造經濟效益之餘，到時中移成億嘅客戶想追貼啲手機新款，都少咗一重顧慮啦，真係一舉幾得。
目前全球每年都有約4億部棄置手機，中國更加佔當中約1億部，大家都知道舊手機零件含有好多有毒物質，例如鉛、鎘、汞等等，處理不當就會嚴重污染生態環境。
之但係，原來一部棄置手機至少可以提煉價值1美元貴金屬，如果全數回收內地每年1億部棄置手機的話，計一計數，即係可以提取1,500公斤黃金、3萬公斤白銀、100萬公斤銅。嘩，咁真係「毒」都變成「寶」喎！
簡勤建議中央應該盡快制訂棄置手機回收處理嘅管理方法，由手機生產廠商、零售商、電訊商牽頭，建立一條龍回收處理棄置手機嘅產業鏈，廢置手機到時就真係變成黃金！