房地產調控政策唔單止影響樓市，仲刺激近期內地離婚率急升，大家唔好以為絲絲講笑，近日南京、上海等城市婚姻登記中心真係多咗好多來協議離婚嘅夫婦，只不過佢哋搞離婚唔係因為感情出現問題，而係想借假離婚避稅，同買第二套房唔使畀多啲首期。好似上海有啲分區，呢兩日離婚人數直情係平日嘅四、五倍。
新「國五條」令離婚潮席捲全國，上海浦東婚姻登記中心淨係星期二一日，就有60對夫妻分道揚鑣，係平時嘅兩倍，閔行區婚姻登記中心受理協議離婚數人數仲創咗單日歷史新高。
除咗因為離婚後，名下冇房產嘅一方買樓，可以唔使因為第二套房要交多啲首期同畀多啲息外，坊間仲針對夫妻間房屋過戶唔徵稅嘅漏洞，流傳避稅「秘技」，建議買賣雙方各自離婚，由賣家男方攜同房產同買家女方結婚，再離婚將房產歸女方，就可避高達兩成嘅個人所得稅。