前日沙特阿拉伯王子阿勒瓦利德（Prince Alwaleed Bin Talal）先至發聲明指摘《福布斯》雜誌啱啱公布嘅「2013年全球富豪榜」，將佢份身家計少咗，轉個頭《福布斯》馬上還擊，大爆王子如何虛榮，以及當初佢入圍《福布斯》富豪榜嘅來龍去脈。
《福布斯》展示多張阿勒瓦利德當上《福布斯》、《時代雜誌》等雜誌嘅封面照，圖上仲寫住「世界最靈敏的商人」等讚譽（圖），本來億萬富豪上封面都唔係咩新鮮事，奇就奇在呢啲封面原來全部都係假嘢，都係阿勒瓦利德請人用photoshop進行偽造，再向各大傳媒機構發放。
《福布斯》仲講到，王子於八八年首次同《福布斯》接觸，至於原因就係王子主動聯絡一名《福布斯》職員，向佢展示自己嘅投資公司Kingdom係幾咁成功。去到○六年，王子又指富豪榜計少咗佢嘅財產，親自打電話，近乎想喊咁向記者質問。《福布斯》直言，1,463個上榜富豪中，無一個好似王子對個排名着緊成咁。
言歸正傳，《福布斯》堅持估計王子嘅財產係200億美元，比王子聲稱嘅少96億美元，因為佢投資旗艦Kingdom Holding嘅市值經常喺富豪榜公布前夕大幅上升。