啲人成日笑人「生人唔生膽」，但絲絲覺得就算先天不足，後天努力都可令人眼前一亮，有「台灣基金教父」之稱嘅日興資產管理亞洲區總裁裴布雷（Blair Pickerell），就成功練大咗個膽。
Blair遺傳咗爸爸熱愛教學嘅基因，喺家鄉美國嘅史丹福大學執過教鞭，仲係港大校董。以為佢好鍾意做演說，點知佢話：「你知唔知點解我做到吖？多得我喺台灣教過書。」
呢位「台灣基金教父」細個嗰時原來好怕醜，淨係當住同學仔面拎個獎呢啲小兒科嘢，都會驚到震，但就喺台灣呢個「訓練場」壯大咗個膽，話說喺台灣生活時，英語老師短缺，有間女校嘅副校長，見佢係老外又有學歷，就破例搵佢返去對住60個女學生教英文，對得多，個人就冇咁緊張，依家直情曉飛喇。
想上堂冇咁悶，Blair時不時都會放笑彈。佢喺嗰年掌握到講咩引到人笑，講咩會換嚟全場烏鴉聲，依家北上出席專題討論都不忘搞gag，劈頭就用普通話自嘲「我係全場普通話最差嗰個」，惹嚟全場大笑。
講開要提防學生作弊，Blair話美國有個做法幾work。學生考試前要簽紙保證自己唔出貓，亦需指證出貓同學，如果有人點出作弊同學，而自己冇出聲都有責任，唔知會唔會引入香港呢？
余詩韻