Market Insight：中國遠洋重新啟航

今日想講吓中央政府工作報告，今年內地以7.5%經濟增長為目標，同去年實際增長睇齊，本來外圍經濟麻麻，原先市場估計，今年中央有機會向下修訂目標在7%附近，結果對內地股市帶來振奮。

要支持民生開支及維持經濟活力，今年中央財政赤字1.2萬億元人民幣，比去年增加近五成，赤佔GDP比例也由去年1.5%升至2%。

放大圖片

放大圖片

內地嚴防經濟過熱

貨幣供應增長目標13%，低於過去年目標及實際的14%及13.8%，是過去十三年來最低，全年通脹目標由4%調低至3.5%。目標數字顯示，今年中央對控制通脹決心都幾大，當前全球三大主要央行，美歐日都傾向透過印鈔推低匯價，以加速經濟復甦，刺激出口能力。

話貨幣戰爭一觸即發，或者誇咗些少，但美國經濟開始復甦，歐洲最壞時間已過，但放水容易收水難，各央行印鈔機無熄機迹象，新興市場包括中國在內，通脹與經濟過熱風險靜靜升溫，相信今年內地水緊情況，可能甚於住年。

講番股事，「國五條」威力漸見消化，早早回吐的內房股終見否極泰來，碧桂園（02007）同越秀地產（00123）升幅都超過4%，睇嚟今浪反彈5至10%的目標，難度唔大。近期個市真係快上快落，前日新能源股係威係勢，點知一日貨仔，昨日已經呆若木雞，推介的保利協鑫（03800）仲要開高收低，認真失禮，但潔淨能源發展是國策使然，本月十四日先出業績，仲有時間睇多兩日。

中興通訊值得憧憬

近兩日二三線股鑊氣重現，國策股之外，部分累積沽空多的股票其實都要睇實，補起倉上嚟唔講得笑。非正式統計，三月上市公司業績black out前，分析員與芬佬約見公司高層活動，反應最冷淡係煤炭及航運股。

昨日留意到，航運股升得唔錯，其中見中國遠洋（01919）一度高見4.4元，升穿二月中高位4.33元，可惜收市前回番些少，收報4.28元，升4.9%，成交接近五星期最多。再睇二月初至今，中遠持續被淡友踩到實一實，得三個交易日沽空比低於一成（過去三日平均22%），基本因素，舊年最壞時間已成歷史，一三年預期市盈率1.29倍，比歷史平均的兩倍折讓唔細，短期成交配合，挾上去4.8至5元機會存在。

此外，早前古勝建議可以買定電訊設備股等運到，終於守得雲開見月明，《中國證券報》報道引述工信部部長苗圩，話一三年內地會發4G牌照，仲話發展4G是通訊產業趨勢，等成個月，昨日乜仇都報晒。

推介過的中興通訊（00763）升8.9%，京信通信（02342）上升11.6%，聯想集團（00992）、中國無線（02369）及TCL通訊（02618）等智能手機生產商，亦統統有進帳。近日中興同英特爾達成戰略合作協議，未來新手機會搭載英特爾新的Atom處理器（聯想已經有三款手機採用），意味中興落實開發高階智能手機，有貨在手不妨畀多點耐性。

醫藥股不妨先食胡

仍停留在魚缸的資金繼續玩碰碰車，昨日醫藥股亦有買盤吸納，相信都係藉流感季節以及城鎮化帶動城市人口對藥品需求炒上，不過現階段都係慢火煎魚，成交增加，但升勢溫和，如中國製藥（01093）以及盈天醫藥（00570）分別升3.7%及4.8%，同仁堂科技（01666）、上海醫藥（02607）、廣州藥業（00874）及國藥（01099）升1至2%，其中廣藥股價再創52周新高，高見22.95元，收報22.25元，疲態初現，持貨者可考慮先食一轉，候調整出現再睇位翻兜。

古勝