孖妹S檔案：金融小花換屆講股

「財記」出身 主攻銀行零售

高妹：未轉戰金融界之前，你做咗財經記者兩年，基本功應該唔錯喇！

　羅：以前做記者，我跟本地銀行及零售行業嘅上市公司，故現時主力研究這兩個股票板塊。除要睇年報及財務報表外，我認為銀行股一定睇息差及不良貸款比率，從而有助分析其盈利好壞；零售股則要睇現金流、應收帳、存貨，因為零售業好講經濟環境好壞，亦有旺淡季嘅周期性因素，如果公司嘅存貨太多，對現金流及盈利都會不利。

陳敏芝（Stephanie）

譚綺蘅（Chelsey）

高妹：咁你點睇上半年港股市況呀？

　羅：近期港股出現調整，主因是市場憂慮美國有可能提早退市，事實上美國經濟似有好轉，但其失業率仍居高不下，通脹亦不明顯，而我估計三月份兩黨仍會在削赤問題纏擾，這些因素都令港股顯得波動。不過，三月份亦屬港股業績期，料部分盈喜股會被投資者追炒，或會成為港股短暫升市嘅催化劑。

小花測市推股

股票推介：達芙妮國際（00210）

半年目標價：11.2

推介原因：預期存貨有改善，免除減價促銷，有助盈利回升；現價估值平

上半年恒指上下波幅：21,000至24,000點

羅湋楠（Kathy）Profile

現職：尚乘財富策劃證券分析員

入行年資：半年

學歷：香港大學文學院文學士，主修日本研究及金融

個人擅長研究股票板塊 消費股、內需股、本地銀行股

投資組合：持有農行（01288）、人民幣定存

個人投資獲利最高金額：趁農行跌穿招股價後入貨，其後沽出一半獲利三成

尚乘財富策劃證券分析員 羅湋楠

煤股專家教揀龍頭

彩兒：你個外形咁嬌滴滴，真係估唔到你係主力研究煤炭股？

　陳：其實今年煤炭股都有些利好因素，投資者隨時可把握時機，入市炒番一、兩轉。首先，今年內地基建項目持續，可拉動對煤炭股的需求；第二，早前中國不再干預煤價，對煤企的盈利有很大幫助。短炒煤炭股宜選龍頭為佳，如神華（01088）及兗煤（01171）。

彩兒：做金融界呢行買賣股票好麻煩嘅，現時你有咩嘢投資幫自己增值財富？

　陳：由入行開始，我就投資拉丁美洲及金磚四國市場嘅基金，暫時回報約賺6%。不過，我發現這些新興市場經濟增長開始減慢，相反中國經濟基本面逐漸轉好，故之後我會把基金組合轉為投資中國及南非。另每月會兌換三千蚊人民幣放回內地銀行作定期儲蓄。

小花測市推股

股票推介：友邦保險（01299）

半年目標價：35元

推介原因：具品牌價值；受惠亞洲市場對長期儲蓄及保險產品需求增加

上半年恒指上下波幅：22,300至24,500

陳敏芝（Stephanie）Profile

現職：金利豐證券高級研究分析員

入行年資：三年半

學歷：英國倫敦政治經濟學院學士、英國埃克塞特大學碩士

個人擅長研究股票板塊：煤炭股、水務股

投資組合：主力投資基金及人民幣定存

個人投資獲利最高金額：實際金額不便透露，但當時賺錢後就買了個名牌手袋送給媽咪

金利豐證券高級研究分析員 陳敏芝

業界新秀睇通外圍

高妹：入行三年，你有無覺得辛苦先？定再有補充實力嘅計劃？

　譚：大學學位只是金融界嘅入場券，好多嘢都是讀書讀唔到的，除年報、財務報表外，亦要學埋睇基本分析及技術分析；不同行業亦要睇不同因素，假日我都會帶些財務報告回家看，盡量把握時間去了解市場。未來我都會考CFA（特許財務分析師），增強自己嘅實力。

高妹：近期港股升升跌跌，我想買貨但又驚低處未算低喎！

　譚：現時港股處於調整期，但受惠業績期開始，相信三月至四月份恒指會間歇性見升幅動力，入市獲利機會唔會話無。若投資者想炒業績股，我則建議避免細價股為妙，因外圍仍存不少變數，如美國削赤問題、意大利大選結果，隨時令港股急跌，令細價股突然之間被挾住，故大家嘅投資態度宜審慎。

小花測市推股

股票推介：佳景（00703）

半年目標價：2.5

推介原因：集團經營各式各樣餐廳，澳門旅客持續增長，有助盈利受惠；估值比同業餐飲股較平

上半年恒指上下波幅：21,500至24,500點

譚綺蘅（Chelsey）Profile

現職：英皇證券（香港）研究分析員

入行年資：三年

學歷：加拿大多倫多大學學士，主修金融及經濟

個人擅長研究股票板塊：濠賭股、零售股、內需股

投資組合：沒持有股票，主力投資基金

個人投資獲利最高金額：○八年金融海嘯以10元買入安碩A50中國（02823），以15元沽出獲利近五成

英皇證券（香港）研究分析員 譚綺蘅

財圈「師姐」 實力昇華

彩兒：十年人事幾番新！照我話，只要你肯搏肯捱，隨時一年就「翻身」喇！好似去年孖妹介紹過嘅幾位金融界小花，其中國泰君安嘅王昕媛、新鴻基金融嘅李惠嫻，過去一年嘅曝光率持續上升，仲做埋《東方日報》嘅專欄作者，定期以分析大市文章與投資者見面，叻女呢？

高妹：叻叻叻！早幾日，我都同李惠嫻通過電郵，知道佢嘅職位由分析員升至高級分析員。但佢好謙虛咁話：「只係職位名稱變咗，之後會見多啲傳媒朋友，同埋專注港股分析。」

彩兒：咁你記得華富嘉洛證券嘅王婉庭嘛？佢無跟股票喇！

高妹：佢轉咗做債券工作呀，現主力分析債市及固定收益產品，有需要可搵佢請教選債策略喎。

彩兒：短短一年時間，呢幾位金融小花嘅職途都發展唔錯，所以大家唔好成日話女人係水造喇！我哋好硬淨o架！

高妹 彩兒

若有料報畀高妹同彩兒或有嘢問，可電郵money.biz@opg.com.hk