絲絲講場：當舖生意40蚊有交易
唔好以為典當業務過晒時，絲絲細閱靄華押業（01319）嘅招股書，知道呢個都係大茶飯，同佢哋主席兼行政總裁陳啟豪傾開，仲聽到唔少古靈精怪嘅古仔。
現今世代，通常啲人會拎咩去典當？最普遍嘅黃金、鑽石就不在話下，最盞鬼就係曾經有人話想當咗張按摩椅喎，當然最終都deal唔到啦，如果得嘅話，絲絲都想試吓當咗張床。
咁通常當到幾錢？陳啟豪話好懸殊o架，最平做過40蚊生意，最貴就收過200萬元嘅名表，都咪話唔犀利！不過做過咁多交易，佢話唔記得40蚊嗰單生意，究竟當咗啲乜。
股票編號「一生足夠」
靄華係第一隻本土當舖股，絲絲聽陳啟豪講，特登揀「1319」呢個股票冧把，因為讀音似「一生足夠」，咁有意思！咁又係嘅，話晒做呢一行，最緊要就係財源滾滾啦。
其實俗稱「二叔公」嘅當舖，非常有本土特色，好多遊客嚟到香港，見到當舖嘅setting咁有趣，總有個「朝奉」（當舖掌櫃）高高在上，但門口又有個屏風遮住，都當特色嘢咁影餐飽。其實有本土特色嘅，又豈止當舖！好似舊年就有本地茶餐廳股，希望遲啲會有更多類似新股出現，股民嘅話題會多好多。
余詩韻