港交所（00388）尋日派成績表，雖然業績認真麻麻，但高層人工花紅照樣「大豐收」，好似行政總裁李小加，去年底薪、花紅、股份獎授及其他福利等等，合共成2,457萬元，比上年度2,307萬元，足足增加6.5%。之不過，港交所去年全年派息只有3.31元，按年跌咗22%，唔知小股東覺得合唔合理呢？
不過，舊年李小加的確做咗件世紀大事，成功收購倫敦金屬交易所（LME），雖然依家冇人知LME「係龍係鳳」，「天價」買番嚟值唔值，但李小加始終係一手一腳將全球最大金屬交易所收歸港交所旗下，董事局始終要獎勵佢嘅！
李小加話尋日份業績的確係「吃苦頭」，「因為路修了、錢花了，但車仲未嚟！」但佢好有信心同決心「車遲早一日會嚟」。各位股東繼續等吓啦！
今日（28日）Last Day嘅上市科主管狄勤思，離開港交所後會先去外地「充電」，臨別秋波，佢喺港交所亦收到份大禮，佢舊年連底薪、花紅、股份同其他福利等，共收1,200萬元。小加「左右手」羅力收購LME有功，收入合計更達1,300萬元，而剛剛調職做環球結算業務主管嘅葛卓豪更勁，有1,483萬元。高層袋袋平安，希望港交所唔好「肥上瘦下」就好喇。
不過，港交所非執董由於舊年袍金加幅唔少，所以今年就再冇人工加。
余詩韻