中央新領導班子嚴禁「三公消費」同「舌尖上嘅浪費」，搞到高級白酒股呢幾個月由基金「寵兒」淪落為「棄兒」。尋日市場勁傳央視為咗迎合「反貪腐」，已經決定唔賣酒類廣告，最快三月尾就會執行。雖然央視廣告部即時否認，不過A股釀酒板塊仍然全線醉死。有內地芬佬好坦白咁講，反貪風一日未完，釀酒股都冇運行，尤其係茅台呢類高檔酒股近排都係少掂為妙。
釀酒企業一向都係央視廣告大客，今年央視黃金廣告時段現場招標，酒企中標金額超過35億人仔，其中劍南春成為央視標王添。所以禁絕白酒廣告消息一出，市場嘩然。央視否認後，有內地媒體話，其實係因為酒類廣告佔比太高，央視最後打通天地線，先免於全面清退。
不過，喺中央「禁酒令」同塑化劑風波嘅雙重打擊下，釀酒股走勢近排難有轉機，好似貴州茅台咁，瑞信最新嘅報告都估佢今年嚟自政府機構嘅訂單會少二成五，軍方訂單更加會少四成，相信目前唔係增持嘅好時機。
余詩韻