蘋果公司周年股東大會尋晚召開，焦點係聽吓舵手庫克有咩好計振興番股價，不過會前就謠言滿天飛，當中一位對沖基金經理引述嘅拆細股份傳聞同埋佢之後嘅沽貨舉動，就最為華爾街口痕友談論，話唔知佢係咪頂唔住股價跌個不停，要出此下策。
話說喺市場薄有名氣嘅對沖基金經理Doug Kass，周二喺Twitter留言，話市傳蘋果可能喺股東會上宣布拆細股份，有關言論隨即令蘋果股價收復失地，並轉跌為升。然而，Kass之後卻打倒昨日的我，話拆細股份一事絕不可能，因為咁樣做需要得到股東批准咁話喎，最令股民不滿係佢老兄仲話自己趁蘋果股價抽高之際減少咗持倉。
以前做過對沖基金經理嘅CNBC著名股評人克拉默，六年前就踢爆過有對沖基金經理蓄意發布假消息將股價舞高弄低嘅伎倆，佢仲喺自己創辦嘅財經網站The Street發布一段影片，親自狠批呢類散貨招數，剛巧Kass又係The Street嘅專欄作家，唔知克拉默對Kass個人有冇新睇法呢！
余詩韻