Market Insight:大昌行分段收集

分析員假如長期預測錯誤,畀錯建議,唔畀人炒魷就奇。相比下,政府財政司司長份工肯定好做好多,單係年年話會財赤,要量入為出,結果年年賣地收印花稅收到庫房水浸,都唔使解釋兩句,咁好嘅工邊度搵!

財政預算案中,財爺建議發新一批通脹掛鈎債券iBond,規模不多於100億元。政府第一次發iBond(04208)是一一年七月,當時內地通脹高企(6.5%),香港進口通脹亦然,但今時唔同往日,內地產能過剩下通脹由高峰回落,估計香港官方通脹數字,未來兩年徘徊3至4%左右。的確,買iBond好過做定期,但想三年內重演首次掛牌後108.4元癲價,睇怕可以死咗條心。

內房股有條件短炒

上星期美國聯儲局議息紀錄顯示,有委員提出縮減買債規模,言論搞到華爾街股市周初跌得四腳朝天,為免未退市先拖冧經濟復甦步伐,伯南克一連兩日為QE護航,隔晚在國會聽證會,話繼續量寬好處比壞處多,暗示印鈔未停得住,道指重返13,900點。衰就衰在,港股依然故我唔多肯跟升,結算日大市反彈57點,報22,577點,主板成交無睇頭,得681億元,大市依然欠缺方向。

昨日內房A股無風起浪,彈得相當勁,像龍頭萬科咁大隻都可以升4.6%,莫非政策風向有變,兩會前中央辣招唔出住?一月至今,事實本地上市內房股累積跌幅唔細,好似批股批到散晒的恒大(03333),由高位4.75元到前日低位3.57元,跌近兩成五,博反彈或者可以諗諗佢。

繼續睇業績,港交所(00388)全年賺40.84億元,按年跌20%,每股盈利3.75元,末期息1.46元,比綜合預測42.9億元低4.8%。去年港股成交淡靜,現貨及衍生產品市場日均成交額,分別跌23%及15%,港交所交易相關收入減少15%至44.98億元。

港交所唔算好吸引

港股一月日均成交回升至782億元,高過去年日均539億元,不過股價亦走先一步,從去年九月低位101.2元,反彈三成六。現價往績市盈率36.7倍,假如今年業績一如樂觀分析員預測升近三成,目前估值還算可以。古勝看,港交所較適合在大部分投資者對後市極為悲觀時收集,而目前顯然未係時候。

大昌行(01828)去年全年賺10.45億元,按年倒退21%,每股盈利57.24仙,派末期息8.88仙,撇開物業重估,經營溢利實際倒退5%。大昌行三大業務範疇,汽車及相關業務、食物及消費品、物流分別佔去年收入比重80.4%、18.6%及1%,去年業績低過市場估計的12億至12.5億元,主因是汽車業務表現,差過預期。

去年大昌汽車及汽車相關業務,營業額升3.8%至386.1億元,分部貢獻卻減少22.7%至12.92億元,一來受中國汽車市場,連續第二年錄得低單位數增長影響,製造商庫存過剩,代理商存貨壓力增加,爭相割價促銷,以及財務費用上升所拖累,再加上去年下半年中日政治關係緊張,日系汽車銷售,第三季開始受到打擊,直到年底方見穩定下來。

業績最壞情況已過

市況不穩,大昌行調整開4S特約店的部署,去年僅有4新店投入,總數增至69間。然而,售後服務仍是汽車相關業務中,增長最快項目,去年錄得28.4%增長,紓緩新車銷售盈利率減低的影響。今年大昌行計劃開21間新4S特約店,當中4間於第一季開業,其餘在一三年稍後及一四年初開業。

大昌行股價由月中高位回落14%,昨中午業績稍低過預期,股價低位有承接,相信短期調整,已把一二年業績不濟反映得七七八八。

日圓匯價近月急跌,展望今年對日系汽車銷售利潤率有幫助,業績最壞情況應在去年第三季已經出現,今年市盈率不足10倍,算有一定吸引力,怕就怕中日政府繼續對峙,擦槍走火,可惜昨日公布業績後股價無跌,唔可以買平一點,較穩陣仲係以分段嘅方式,在8元樓下分批收集。

古勝