內地投行一哥中金呢兩年深受人才流失問題困擾，尋日有外電傳出喺中金主管併購業務嘅投行部董事總經理徐翌成將會「退休」，工作由同屬投行部董事總經理嘅王子龍接管。
呢幾年中金有唔少元老級人物跳槽，先前有貝多廣跳咗去摩根大通、哈繼銘轉投高盛懷抱，近排跳槽現象向下延伸，農曆新年前啱啱傳出有三個明星分析員會一齊出走，其中負責文化傳播業分析嘅金宇仲係畀百度挖角，過檔去做首席戰略官。
而最新傳出會離職嘅徐翌成，號稱係中金最後生嘅董事總經理之一，今年雖然只係得38歲，但係就操刀過平保收購深發展等大刁，投行經驗豐富，市場相信佢應該都似係另有高就多過「退休」。
余絲韻