隨着中央加大力度推動環保工業，市場繼續追住炒作環保概念股，而近年中央持續用補貼形式去支持行業發展，尤其刺激節能汽車消費。不過電動車市場嘅發展就唔係咁理想，Prof. J反而見相關節能電池發展更加迅速。
天能動力（00819）作為中國內地龍頭綠色能源供貨商，喺內地產銷電動自行車鉛酸動力電池，業務遍及電動自行車動力電池、電動汽車動力電池、儲能電池以及廢舊電池回收業務。至去年六月底為止，中期純利增長87%，至3.76億元人民幣；毛利率由22.5%大幅提升至25.8%。業績優於預期，除了銷售持續增長外，鉛價疲弱及產品組合改變均有利公司利潤。
其實鉛蓄電池非但唔係環保股，更屬於「污染股」。不過，暫時無法取代鉛蓄電池做電動車電池，中央惟有提高門檻嚟淘汰啲污染嚴重嘅企業。早前就頒布《循環經濟發展戰略》，將鉛酸電池列為其中一種廢舊資源再生使用嘅產品，減輕污染。Prof. J見天能嘅鉛回收業務開始提供盈利貢獻，估計可提升毛利率1.5個百分點，有助進一步推升集團嘅龍頭地位。
有小道消息指，目前北京會加大推動出租車、公交車使用純電動車，並積極引導消費者購買，而私人購買嘅配套政策亦有機今年內推出。天能作為龍頭股，理所當然有較強嘅議價能力，而股價近日亦突破5.5元阻力，走勢明顯轉強。繼續追蹤，出發！
香港大學電子金融服務榮譽助理教授 徐燦傑