股神巴菲特喺剛過去嘅情人節，孖住巴西投資公司3G Capital，以280億美元收購老牌茄汁生產商亨氏，即刻要乸唔要仔，賣甩旗下同亨氏唔多啱key嘅龍鳳食品企業。
龍鳳食品嘅核心業務係急凍食品嘅生產同銷售，同亨氏以生產茄汁同BB食品為主確實大纜都扯唔埋，而且做又賺得唔多錢，難怪巴菲特要賣走佢！
分析就話，亨氏同龍鳳之間存在太多差異，除咗兩間公司性質唔同之外；一間係美國公司，另一間就係經營內地業務嘅台灣公司，兩間公司嘅管理、成本控制方面都好唔同，管理上會出現有好多困難。
加上近年嚟，龍鳳嘅市場競爭力愈嚟愈低，以前作為市場領跑者嘅龍鳳，喺短短幾年間已經畀三全食品、灣仔碼頭同埋思念食品代替咗。今次收購龍鳳嘅，正係鄭州三全食品。
自從亨氏收購龍鳳之後，都曾經打算喺高端市場發展，不過最終都得唔到好嘅成績。況且股神今次收購亨氏，係用槓桿式收購，放棄非核心業務，係拉高槓桿率效益嘅做法。
余詩韻