改變香港人生活嘅八達通今年十六歲生日喇！呢項產品其實顛覆咗香港人嘅生活，冇帶八達通慘過冇帶身份證，除咗交通、零售支付等功能，愈嚟愈多屋苑以「嘟」八達通卡代替密碼鎖開門，呢個服務叫「門禁服務」，但八達通行政總裁張耀堂（Sunny）似乎唔係好鍾意個名喎，佢話「門禁服務」印象負面，「門開」好似適合啲咁話喎。
講開「門禁」，同八達通嘅增值服務都有啲相似，冇咗增值功能，真係乜都禁o架！佢舉咗個例子，話說佢有個朋友向佢反映：「只要試過一次喺停車場出口處，張八達通唔夠錢，有成隊車龍喺後面『砵』你，就會知道無自動增值服務係幾唔方便，一次呢啲意外，你就會的起心肝去申請自動增值！」絲絲都試過用一張冇乜錢嘅八達通，連巴士收費都唔夠畀，又冇散銀，真係狼狽萬分。
隨着網上購物普及化，八達通都研究進軍網上支付領域，Sunny仲舉咗個例子，說明開發網上支付嘅好處：「依家囝囝喺網上購物，都係用我個信用卡號碼埋單，好似打開咗個金礦咁。用八達通做網上支付，就可以避免呢啲問題喇！」但係Sunny就無講明八達通網上支付嘅模式，話要賣個關子先喎！
余詩韻