萬科以B轉H股方式來港上市，好多人都(目及)實進度，喺香港上咗市廿多年嘅中國海外（00688），主席孔慶平以經驗之談教路，如果內地企業想嚟港上市，應轉以紅籌上市，不應以H股上市。
萬科上市後，內房fans又多一個選擇，即係中海會多一個對手，孔慶平尋日好不經意咁話，「大家咪多個選擇囉！不過佢哋流通量好少。」
早排萬科亦同新世界（00017）拍住上喺香港投咗塊地，話晒大家同鄉，中海喺香港又有經驗，絲絲就問孔總第日會唔會同萬科合作，佢就話同邊個合作都歡迎，不過規模細嘅項目，集團一般獨資發展，如果「大到食唔晒」就會合作。孔總仲爆，對金鐘中信前面嘅臨海地皮好有興趣，嗰個項目面積成500萬呎，有一半樓面係發展寫字樓o架。
孔總尋日同一大班老友春茗，公司預備咗24條有關集團嘅問題，考吓大家，絲絲打算搵孔總通吓水，順便考考佢，不過孔總都好公正，笑笑口話睇唔到啲字，氹到大家好開心，除咗絲絲之外。