臨近兩會，內地官場人事變動傳聞滿天飛，就連「一行三會」呢幾個金融監管部門話事人會點擺位都有幾種唔同講法。尋日微博漏出一段安信證券策略師程定華，同私募基金大佬徐翔嘅午餐會談話記錄，程定華話自己由管理層得到訊息，中證監、中保監同中銀監三個主席有兩個要換，雖然個位換邊個坐仲未知，但聽聞中證監主席郭樹清係喺要被換嘅考慮名單上面。
十八大入選中央委員嘅郭樹清，原本係接替周小川出任人行行長嘅大熱選，然而盛傳周小川會繼續留任人行行長一職，現任中行董事長肖鋼就會將個位讓畀人行現任副行長胡曉煉，過檔去人行做黨委書記，同周小川拍住聯手執掌人行，不過，有消息話，郭樹清、尚福林同肖鋼近排都畀有關部門叫過去談心，即係「一行三會」新掌舵人一日未正式開估都仲有變數。
除咗監管部門，央企人事近排都有唔少調整，國資委尋日就一次過公布咗幾間央企高層嘅任命，好似周文傑咁，以後唔再擔任東風汽車黨委常委同副總經理職務，前中石油集團副總經理曾玉康就會出任鞍鋼集團外部董事，幫鞍鋼出謀劃策。