將強積金組合扔埋一邊，無論點講都係唔啱嘅，韜睿惠悅投資顧問香港總監曹偉邦（Philip）話自己得公積金（ORSO），但一樣有打理強積金嘅經驗，皆因佢負責幫Philip媽打理強積金，期間只係調配過兩次基金組合，就咁啱避過金融海嘯一劫！
金融海嘯底下，唔少打工仔個強積金組合都「見紅」，Philip媽就非常好彩，全靠Philip幫佢調配股債基金比例。
由於Philip媽準備退休，所以Philip喺○八年就增持債券基金比例至整體嘅八成，即係坊間所講，「鎖住啲錢先，仲咁啱避過咗金融海嘯個大跌市！」
早幾年Philip媽退休，亦只係拎咗一半錢，剩低嘅全放喺環球債券基金滾存，用嚟對抗通脹！至今，Philip媽每次收到周年報表，都會慣性拎畀Philip過目，講到尾係自己辛苦賺來嘅錢，當然比較上心啦！
其實，打工仔應該以Philip媽做榜樣，得閒拎張月結單研究吓，唔識睇嘅，就要請教專業人士喇！
至於好多人都話強積金啲錢唔夠退休用，Philip就話，「強積金只係三大支柱之一，唔夠使咪遲幾年先退休囉！」